Ниҳолшинонӣ дар шаҳри Душанбе
Дар асоси қарори марбутаи раиси шаҳри Душанбе “Дар бораи тасдиқи Нақшаи чорабиниҳо оид ба ниҳолшинонию сабзкорӣ дар мавсими тирамоҳи соли 2022 ва баҳори соли 2023 дар шаҳри Душанбе шинонидани 193499 бех ниҳолҳои ороишӣ, сояафкан, мевадиҳанда, ниҳолҳои буттагӣ ва ба миқдори 13 147 315 дона гулҳои мавсимию бисёрсола ва лола шинонида мешавад.
Дар ҳудуди гулгашту хиёбон, кӯчаҳо ва боғҳои фарҳангу фароғатии ноҳияҳои пойтахт ба миқдори 114616 бех ниҳол шинонида шуда, ҷиҳати таъмини шукуфоӣ ва сарсабзии кӯчаву хиёбон ва шоҳроҳҳо ба миқдори 7 144 754 дона гулҳо шинонида шуд, ки аз ин 5 254 582 ададаш гули лола мебошад.
Гузашта аз ин, роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон ҷиҳати саҳмгузорӣ дар таъмини ба “шаҳри сабз” табдил додани Душанбешаҳр дар ҳудуди МД “Боғи Ғалаба ва нигоҳдории ҷангал” шинонидани 4715 бех ниҳолҳои ороиширо амалї намуда истодааст.
Бояд зикр намуд, ки дар ҳудуди “Боғи Ғалаба ва нигоҳдории ҷангал” дар маҷмӯъ ба миқдори 58163 адад дарахтони ороишӣ ба нақша гирифта шуда, то имрӯз аз тарафи ташкилоту идораҳои муаззафшуда ба миқдори 48552 бех ниҳол шинонида шуд.
Дар ин зимн, иттилоъ медиҳем, ки роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон тасмим гирифтааст, ки ниҳолҳои ороиширо дар мавзеи Обшорон, талу теппаҳои маҳаллаҳои Лучоб ва Гулдара шинонида, ҷиҳати ободу зебо ва шукуфон гардидани минтақаҳои пойтахт нақши сазовор гузорад.