Иштироки Баҳодур Шерализода дар ҷаласаи нишасти вазирони ҳифзи муҳити зисти “Саммити Овози Ҷануб”                                               

12 январи соли 2023 Раиси Кумитаи ҳифзи муҳити зисти назди Ҳукумати Ҷумҳурии Тоҷикисон Шерализода Баҳодур Аҳмадҷон дар ҷаласаи нишасти вазирони ҳифзи муҳити зист дар доираи баргузории “Саммити Овози Ҷануб” таҳти унвони “Ба мувозинат овардани рушд бо муҳити зист-тарзи ҳаёти бехатар”, ки бо мизбонии Ҳукумати Ҷумҳурии Ҳиндустон доир гардид, ба таври маҷозӣ иштирок ва суханронӣ намуданд.

Дар кори саммит намояндагон аз 140 кишвари дунё иштирок варзида, вобаста ба масоили рушди устувор, мувозинаткунии рушд бо иқдомҳо дар ҷодаи пешгирии тағйирёбии иқлим, авлавиятҳои кишварҳои ба тағйирёбии иқлим осебпазир, эҳёи амалияҳои анъанавии ҳассос ба тағйирёбии иқлим ва дигар ҷанбаҳои марбут ба соҳа табодули афкор намуданд.

Зимни баромади хеш Раиси Кумитаи ҳифзи муҳити зисти назди Ҳукумати Ҷумҳурии Тоҷикисон Шерализода Баҳодур қайд намуд, ки дар давоми панҷ соли охир мо шоҳиди гармшавии бесобиқаи глобалӣ гардидем, ки боиси хушксолӣ ва дигар офатҳои табиӣ дар миқёси ҷаҳон гардид, ки ба таъмини амнияти озукаворӣ ва дигар соҳаҳои иқтисодиёти мамлакатҳои мо таъсири манфӣ расонид. Аз ҷумла, обшавии барфу пиряхҳо ва яхбандии абадӣ таъсири доимӣ дошта, гармшавии глобалиро метавонад суръат бахшад.

Қайд гардид, ки кишвари мо ҳамасола дар натиҷаи офатҳои табиӣ садҳо миллион доллари ИМА зарар дида, ҷиҳати ноил шудан ба Ҳадафҳои Рушди Устувор мушкилот эҷод намуда, боиси талафоти ҷонии одамон ва хисороти зиёд ба инфрасохтори ҳаётан муҳим мегардад.

Масоили дигари ин равандӣ обшавии босуръати пиряхҳо мебошад. Зеро тайи чанд даҳсолаи охир дар Тоҷикистон беш аз ҳазор пирях комилан аз байн рафтааст.

Дар ин замина Ҳукумати Ҷумҳурии Тоҷикистон “Барномаи давлатии омӯзиш ва ҳифзи пиряхҳо то соли 2030”-ро таҳия ва қабул намудааст. Дар ин доира аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон ҷиҳати назорати тамоюли обшавии пиряхҳо ва ҷамъовари маълумотҳои илмӣ дар назди Агентии обуҳавошиносӣ Маркази пиряхшиносӣ таъсис дода шуд.

Боиси ифтихор аст, ки пешниҳоди Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар бораи “Соли байналмилалии ҳифзи пиряхҳо” эълон кардани соли 2025 аз ҷониби Маҷмаи Умумии Созмони Милали Муттаҳид дастгирӣ ёфт ва 14 декабри соли 2022 Қатънома ба тасвиб расида, санаи 21 март ҳамасола дар сатҳи ҷаҳон ҳамчун “Рӯзи ҷаҳонии пиряхҳо” ҷашн гирифта мешавад.

Робита байни тағйирёбии иқлим, об, энергетика ва амнияти озуқаворӣ яке аз воситаҳои асосии ҳалли ин мушкилоти мураккаб мебошад. Ин нуқта барои Тоҷикистон махсусан муҳим аст, зеро қариб 80 фисади маҳсулоти кишоварзӣ дар заминҳои обӣ истеҳсол карда шуда, зиёда аз 98 фисади қувваи барқ дар мамлакат аз ҳисоби неругоҳҳои барқии обӣ ҳосил карда мешавад. Тоҷикистон аз рӯи тавлиди нерӯи барқи обӣ дар ҷаҳон ҷои 6-умро ишғол мекунад ва метавонад ҳамчун манбаи “энергияи сабз” барои тамоми минтақа хизмат кунад ва баҳри ноил шудан ба Ҳадафҳои Рушди Устувор саҳми арзанда гузорад.

Ёдовар мешавем, ки “Саммити Овози Ҷануб” бо мизбонии Сарвазири Ҷумҳурии Ҳиндустон Нарендра Моди санаи 12-13 январ доир гашта, дар он 10 адад ҷаласа, сессияҳои ибтидоӣ, ҷамъбастӣ ва 8 адад нишасти вазирони муҳити зисти кишварҳои ҷаҳон роҳандозӣ карда шуда, сарони давлатҳо ва ҳукуматҳои Ветнам, Камбоҷа, Муғулистон, Аморати Муттаҳидаи Араб, Тайланд, Эфиопия, Мадакаскар, Молдова, Македония ва намояндагони беш аз 120 давлати ҷаҳон ширкат варзиданд.