Кумита бахшида ба 32-солагии Истиқлолияти давлатӣ корхонаҳои намунавии саноатиро қадрдонӣ намуд             

                                          

Кумитаи ҳифзи муҳити зисти назди Ҳукумати Ҷумҳурии Тоҷикистон дар татбиқи сиёсати давлатии экологии Ҷумҳурии Тоҷикистон баҳри беҳдошти муҳити зист, истифодабарии оқилонаи сарватҳои табиӣ ва таъмини амнияти экологии аҳолӣ ҳамкории густурдаро ба вазорату идораҳо, ташкилоту муассисаҳо, мақомоти иҷроияи ҳокимияти давлатӣ, ташкилотҳои байналмилалию ҷамъияӣ ва ғайра ба роҳ мондааст. Яке аз объектҳое, ки Кумита бо онҳо ҳамкории зич дорад, ин корхонаҳои саноатии кишвар мебошад.

Кумита ҳамчун мақоми салоҳиятдор дар назди Ҳукумати Ҷумҳурии Тоҷикистон тибқи Нақшаи чорабинии ҳамоҳангшуда ҳамасола фаъолияти чунин корхонаҳоро мавриди санҷиш қарор дода, ҷиҳати риояи ҳатмии талаботи роиҷи экологӣ ва дар сурати ошкор намудани камбудиҳои ҷойдошта ба онҳо ҷиҳати бартарафсозӣ дастурҳои хаттии иҷрояшон ҳатмӣ медиҳад.

Бахшида ба Ҷашни 32-солагии Истиқлолияти давлатии Ҷумҳурии Тоҷикистон, ки санаи 8 сентябри соли ҷорӣ бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон баргузор гашт, барои ноил шудан ба натиҷаҳои дилхоҳ дар истифодабарии оқилонаи сарватҳои табиии Тоҷикистон, ҳамкории доимӣ бо мақомоти ҳифзи муҳити зист, андешидани тадбирҳои лозимӣ баҳри таъмини бехатарии экологии аҳолӣ Ҷамъияти саҳҳомии кушодаи “Ширкати Алюминийи Тоҷик” дар шаҳри Турсунзода Ҷамъияти дорои масъулияташ маҳдуди “Ширкати металлургии Анзоб”-и ноҳияи Айнии вилояти Суғд бо Сипосномаи Кумитаи ҳифзи муҳити зисти назди Ҳукумати Ҷумҳурии Тоҷикистон қадрдонӣ карда шуданд.

Кумита ҳамеша омода аст ба ҳамаи ташкилоту муассисаҳое, ки фаъолияташон ба муҳити зист метавонад таъсиргузор бошад, ҳамкорӣ намояд.